പെൻഡുലം

സ്വർഗ്ഗത്തിന്റെ കാവൽക്കാരാ
എനിക്കൊരു പാസ്‌ തരിക.
ഇങ്ങനെ തുറിച്ചു നോക്കേണ്ടതില്ല.
നരകമാണെന്റെ ഇടമെന്ന് എനിക്കറിയാം.
ഉന്മാദത്തിന്റെ ഒരിടവേളയിൽ
ഞാൻ ഇറങ്ങി വന്നെന്നേയുള്ളൂ.
ഒരു വിസിറ്റിംഗ്‌ പാസ്‌ മാത്രം തരിക.
മുൻപ്‌ യാത്ര ചൊല്ലാതെ ഇവിടെ നിന്നും
കലഹിച്ചിറങ്ങിയപ്പോൾ
തിരികെ വിളിച്ച ചില കൂട്ടുകാരുണ്ട്‌.
അവരോട്‌ മാപ്പ്‌ പറയണം.
പിന്നെ,
സ്വർഗ്ഗവും നരകവുമല്ലാത്ത
ഒരിടത്തേക്ക്‌ മടങ്ങിപ്പോവണം.
എങ്കിലും ഞാൻ തിരിച്ചെത്തുമെന്നോർപ്പിക്കട്ടെ.